TINEO.- Mascarada de invierno de los Guilandeiros
El próximu sábado, 28 de xineiru, tendrá l.lugar la salida de los Guilandeiros de Tinéu por diferentes pueblos del conceyu. Será la sesta salida desde que se recuperóu esta mascarada d’inviernu formada, anguano, por una treintena de personaxes que destacan pol coloríu ya la variedá.
A las 10 h. de la mañana del día 28 será la xuntanza de los Guilandeiros na Plaza del Ayuntamientu de Tinéu, que tarán acompañaos tola xornada por una bandina de música tradicional. Como tolos años, habrá novedades na salida d’este añu, col fin d’aportar siempre dalgo nuevu respetando, en tou casu, la esencia del eventu. Nesta edición, los novios (dama ya galán) saldrán a caballu desde la plaza l’ayuntamientu. No conceyu de Tinéu era habitual, especialmente por tierras vaqueiras, que los novios foran a caballu a la boda, acompañaos d’amigos ya invitaos. Tratamos, asina, d’homenaxear las antiguas tradiciones del nuesu pueblu.
A las 11:30 h. los Guilandeiros l.legarán al pueblu de Truébano pa, a continuación, de 12:30 a 13 h., dirixise a Nieres. Pola tarde, visitarán el pueblu de Berzana. En tous estos l.lugares, representarán una comedia ya l.levarán l’alegría a la xente a cambiu del apreciáu aguinaldu.
