CANGAS DEL NARCEA. Al son del cantar
Las ganadoras del conceyu Cangas de la edición última del concursu de la Rede de Normalización Llingüística nos Conceyos «Al Son del Cantar» van recibir el sou premiu en forma de discu na gala programada pa esti vienres 27, a las 18:30 horas, no Valey de Piedrasblancas.
El certame ta dirixíu al alumnáu del ciclu segundu de Primaria ya al del ciclu primeiru de Secundaria, al que se convida a componer un cantar ya escribi-y una ḷḷetra. El meyor de cada conceyu con SNL escóise pa representar al conceyu ya inclúise dientro d’un discu qu’edita la Dirección Xeneral de Política Ḷḷingüística del Principáu d’Asturias.
Amás, los cantares del discu son todos interpretaos por grupos ya solistas profesionales del territoriu, que contribúin a la campaña de manera desinteresada dafeitu.
La edición anterior fui ganada pol CRA Cibea ya esta última pol IES de Cangas. Varias alumnas: María Rodríguez López (1º ESO), Ángela Fernández Rodríguez (2º ESO), Paula Flórez García (2º ESO), Xana Martínez Amago (2º ESO), María Fernández Martínez (3º ESO), Saray García Pérez (1º Bachiller) ya Davinia García Pérez (1º Bachiller) presentanon el cantar «Himnu a las muyeres», un cantar que reivindica igualdá ente homes ya muyeres.
El cantar compuestu por las alumnas del IES fui interpretáu por Calea no discu que vei presentase ya entregase a las ganadoras ya los ganadores ya a los grupos que colaboranon na gala del Valey.
Dende aiquí queremos felicitar a las ganadoras ya dar las gracias al grupu pola súa implicación.
