NARCEA.- Una apuesta musical de normalización llingüística
Col empiece del cursu escolar 2018-2019, la Rede de Normalización Llingüística nos Conceyos deseña una campaña nueva que pretende dar un xiru a tolo feito antias. Trátase d’un concursu que busca la participación activa no procesu de normalización ḷḷingüística de las escolinas ya escolinos del ciclu segundu de Primaria ya del primeiru de Secundaria, a los que se propón componer un cantar xunto cona súa melodía cono obxectu de participar nun concursu que premia a las ya los ganadores cona grabación de los temas por profesionales de la música asturiana. La participación reduzse, eso sí, a los conceyos que cuntan con servicios de normalización ḷḷingüística adscritos a la campaña, nesti sentíu, los participantes son Siero, Cangas, Llaviana, Samartín del Rei Aurelio, Llanera, Comarca la Sidra (Villaviciosa, Colunga, Nava, Cabranes, Bimenes ya Sariegu) ya Ḷḷena. La recepción yá más que bona, de feitu, nesti primer proxectu pilotu participan 17 centros d’Asturias con 24 cantares presentaos en total. De los 24 cantares, escóinse 7 ganadores, unu por conceyu participante, con todo, nel discu inclúinse 11 piezas, cumo premiu a la calidá nel casu de las non premiadas. Conocíu’l determín del xuráu del concursu, formáu por personal de los servicios de normalización ḷḷingüística d’Asturias, toca materializar el proyectu. Nesti momentu, la Dirección Xeneral de Planificación Llingüística y Normalización asume la financiación del procesu de deseñu, grabación y maquetación y la propia gala de presentación, incluyida dientro de los actos dedicaos a la XL Selmana de les Lletres Asturianes, dedicada a la promoción de la música asturiana de los 40 años últimos.
El Conceyu Cangas, al traviés del sou Serviciu de Normalización Ḷḷingüística, promovíu esti concursu na zona consiguiendo que fora’l conceyu onde se rexistróu la mayor participación. Del total de proxectos presentaos, resultóu ganador el cantar Muitas cousas, del CRA Cibea, formáu polas escuelinas de Ḷḷamera, Ḷḷumés ya Carbachu. Un cantar de calidá alta onde queda patente la importancia de que’l facer educativu s’asiente nun contextu cercanu a la rialidá del alumnáu, la garantía de la tresmisión del nuesu patrimoniu inmaterial ya la implicación de las nenas ya nenos ya del propiu equipu docente.
Pa premiar el trabayu bien feitu, amás del discu, celebraráse una gala de presentación el día 19 d’abril, a las 18:00 horas, nel auditoriu de La Pola Siero. Nesta gala, actuarán los grupos ya l’alumnáu de los 7 cantares ganadores, ente eḷḷos L-R, qu’interpretará’l cantar Muitas cousas acompañáu de las escolinas ya escolinos del CRA Cibea de Cangas. Nun será esta la oportunidá única d’escuitar a esti grupu interpretando esta pieza, yá qu’ofrecen un conciertu en Cangas el 23 de mayu, a las 20:00 horas, dientro de los actos programaos pa la XI Sumana de las Ḷḷetras Asturianas.
La conceyala de Cultura, Carmen Riesco Combarro, anima a la ciudadanía a acompañar al alumnáu del CRA Cibea na súa puesta de ḷḷargo ya valora mui positivamente la implicación de la comunidá educativa no procesu de dignificación ya normalización ḷḷingüística que promueven esta ya outras campañas del Serviciu de Normalización Ḷḷingüística. Amás, recuerda que, na sumana del 20 al 25 de mayu, el Conceyu Cangas celebra la súa XI Sumana de las Ḷḷetras Asturianas con una programación variada ya rica adaptada a perfiles d’edá ya inquietudes diferientes qu’abarcan teatru, cine ou música, anque, en consonancia cona programación presentada pola propia Conseyería de Cultura, dando mayor protagonismu a la última.
